Orationes Rythmicae in laudem B. Mariae

Alc. 149

Imperatrix Reginarum⁵⁰

1	[Fol. 11r]
	IMPERATRIX REGINARVM
	et saluatrix animarum,

2	Preciosa margarita,
	rosa gelu non atrita.

3	Lux solaris, clara Stella,
	spiritalis Dei cella

4	Paradisi patens porta
	per quam salus fuit orta,

5	Benedicta, gloriosa,
	super omnes speciosa.

6	Virga Iesse generosa,
	pulcra, nitens et formosa.⁵¹

7	Vas electum creatoris,
	medicina peccatoris.

8	Super choros angelorum
	exaltata, spes lapsorum.

9	Lepre tabes peccatorum,
	ad te clamo fons ortorum.

10	In extremo uite pirgo,
	me tuere pia virgo.

11	Vitis sacra, dulcis uua,
	fidem sicientis iuua.

12	Ex oliue tue ramo,
	mitte guttam quam reclamo.

13	In camino uitiorum,
	stabiliui mihi thorum.

14	Ex marrulla pietatis
	funde rorem castitatis.

15	Cuius sacrum per liquorem
	tu extinguas hunc ardorem,

16	Ac per spiritalem facem,⁵²
	prorsus uras hanc fornacem.

17	Multa flamma iam surrexit,
	multus fetor inde exit.⁵³

18	Ita fumi fetor olet,
	sulfur ut olere solet.

19	Inimicus ob reatum
	talem dedit odoratum.

20	Sed tu pia iam regina⁵⁴
	fac ut cadat hac pruina.

21	Fac calere solem uite,
	et pruinam hanc remitte.

22	Ipsum solem interpella,
	per quem lucet omnis stella.

23	Vt in solem quem rogamus⁵⁵
	tabernaculum ponamus

24	Et ab ipso doceamur
	per quod iter gradiamur. Amen.⁵⁶

Angelorum et Celorum Dominatrix⁵⁷

1	ANGELORUM
	et celorum
	dominatrix,
	Spes iustorum,
	perditorum
	subleuatrix,

2	Rosa mitis,
	radix uitis
	non atrita,
	Miro more
	celi rore
	fecundata,

3	Mundi lumen
	nouum numen
	castitatis.
	Nulli tacta
	mater facta
	ueritatis,

4	Que uirtutis
	et salutis
	es solamen,
	Et paruorum
	meritorum
	medicamen,

5	Iam peccatis
	perpetratis
	medicare;
	Fac futura
	nocitura
	procul stare.

6	Stella, solem,
	uirgo, prolem
	edidisti;
	Matris iura
	semper pura
	tenuisti.

7	Porta poli,
	Christo soli
	patuisti;
	Plenus igne,
	rubum digne,
	non arsisti.

8	Nec uirore,
	pro calore
	depriuaris,
	Cum honorem
	et pudorem
	tuearis.

9	Floruisti,
	protulisti,
	uirga, nucem;
	Concepisti,
	peperisti,
	uirgo, ducem.

10	Tu oliua,
	semper uiua,
	uerum lumen.
	Genuisti;
	fons, dedisti
	magnum flumen.

11	Cuius [cursus]
	et recursus
	ciuitatem,
	Facit letam
	post deletam
	prauitatem.

12	Misso celi
	Ghabrieli⁵⁸
	salutata;
	Ex auditu,
	nouo ritu,
	fis pregnata

13	Cuius ore
	plena rore,
	mundi plaustrum,
	Suscepisti;
	tenuisti,
	uentre, clausum,

14	Summo patre,
	sine matre
	generatum,
	Verbum patris,
	auri matris
	propalatum.

15	Dei natum
	minoratum
	uoluntate,
	Iure matris
	parem patris
	deitate.

16	Nam maiestas
	et potestas
	naturalis.
	Genitotis
	redemptoris
	est equalis.

17	Deus uerus,
	panis merus
	angelorum.
	Factus cibus
	per te tritus⁵⁹
	terrenorum.

18	Te terrena
	fece plena
	redempturus,
	Facit matrem
	sed non patrem
	relicturus

19	In te latet
	per quem patet
	orbis totus,
	In Iudea,
	gente rea,
	Deus notus.

	Incarnatum
	Dei natum
	reddidisti.
	Summum ducem
	mundo lucem
	tribuisti;

21	Cuius ortus
	uite portus
	et salutis.
	Ipse dator,
	et amator
	est uirtutis.

22	Gratulatur
	et letatur
	hinc fidelis;
	Contristatus
	et grauatus
	infidelis.

23	Ergo pia
	luce dia,
	uirgo plena,
	Tu benigna,
	laude digna,
	tu serena,

24	Imperatrix,
	mediatrix,
	apud Deum,
	Meum curis
	cor lesuris
	munda reum.

25	[O] Maria,
	uite uia
	spiritalis,
	Dei cella,
	maris Stella
	singularis,

26	Templum Dei,
	salus rei
	destinata,
	Tanto nato
	tam beata
	grauidata.

27	Tu clamantis
	et rogantis
	audi uota;
	Infelicis
	peccatoris
	prece mota

28	Solue reum,
	precem meam
	nato defer.
	Et ab eo
	summo Deo
	uitam refer.

29	De te factum,
	mater, natum,
	nata, patrem,
	Postulare
	tu dignare
	per te matrem.

30	Nos coronet,
	uitam donet
	sempiternam;
	Qui laudamus
	et amamus
	fidem trinam.

31	Nos tenemus
	et timemus
	diligendo;
	Honoramus,
	adoramus
	confitendo.

32	Personarum
	distintarum
	trinitatem,
	Et nature
	semper pure
	unitatem,

33	Deitatis
	potestatis
	puritatem;⁶⁰

34	Nec personas
	sicut donas
	confundentes,
	Nec naturam
	semper puram
	diuidentes,

35	Cui maiestas
	et potestas
	sit cunctorum,
	[Et] percursum
	et recursum
	seculorum. Amen.

Planctus ante Nescia⁶¹

1	[Fol. 11v]
	PLANCTVS ANTE NESCIA
	planctu lassor anxia
	crucior dolore.
	Orbat orbem radio
	me Iudea filio,
	gaudio, dulcore.

2	Fili, dulcor unice,
	singulare gaudium
	matrem flentem respice,
	conferens solatium.

3	Pectus, mentem, lumina
	tua torquent uulnera,⁶²
	que mater, que femina
	tam felix, tam misera?

4	Flos florum
	dux morum,
	uenie uena,
	quam grauis,
	in clauis
	est tibi pena!

5	Proh, dolor!
	hinc color
	effugit oris
	hinc fluit⁶³
	hinc ruit
	unda cruoris!

6	O quam sero deditus
	quam cito me deseris,
	o quam digne genitus,
	quam abiecte morieris!

7	O quis amor corporis
	tibi facit spolia.
	O quam dulcis pignoris,
	quam amara premia.

8	O pia
	gratia
	sic morientis!
	O zelus,
	o scelus
	inuide gentis!

9	O fera
	dextera crucifigentis!
	O lenis
	in penis
	mens pacientis!

10	O uerum eloquium
	iusti Simeonis!
	Quem promisit gladium
	sencio doloris!
	Gemitus, suspiria
	lacrimeque foris,
	uulneris indicia
	sunt interioris.

11	Parcito proli,
	mors, mihi noli
	tunc mi soli
	sola mederis.
	Morte, beate,
	separer a te,
	dum modo, nate,
	non cruciens.

12	Quod crimen, que scelera
	gens commisist effera!
	Vincla, uirgas, uulnera,
	sputa, spinas, cetera
	sine culpa patitur.
	Nato, queso, parcite.
	Matrem crucifigite,
	aut in crucis stipite
	nos simul affigite,
	male solus moritur.

13	Reddite mestissime
	corpus uel exanime.
	ut sic minoratus
	crescat cruciatus,
	mutuis amplexibus.⁶⁴
	Vtinam sic doleam
	ut dolore peream
	nec plus est dolori
	sine morti mori
	quam perire cicius.

14	Quid stupes, gens misera
	terram se mouere,
	obscurari sidera,
	languidos lugere?
	Solem priuas lumine,
	quomodo luceret?
	Egrum medicamine
	unde conualeret?

15	Omicidam liberas
	Ihiesum das supplicio,
	male pacem toleras
	uenitque sedicio.⁶⁵

16	Famis, cedis, pestium;
	scies docta pondere
	Ihesum tibi mortuum
	Barabamque uiuere!

17	Gens ceca, gens flebilis,
	age penitentiam
	dunt tibi flexibilis
	Ihesus est ad ueniam.

18	Quos fecisti fontium
	prosint tibi flumina,
	sitim sedant omnium,
	cuncta lauant crimina.

19	Flete Syon filie
	tante grate gratie,
	iuueuis angustie⁶⁶
	sibi sunt delicie,
	pro uestris offensis.
	In amplexibus ruite,
	dum pendent in stipite,
	mutuis amplexibus
	se parat amantibus
	brachiis protensis.

20	In hoc solo gaudeo
	quod pro uobis doleo.
	Vicem, queso, reddite,
	Matris damnum plangite.

Summi Regis Factura

1	[Fol. 12r]
	SVMMI REGIS FACTVRA
	salue preciosa.
	Pias aures adhibe,
	mitis, gloriosa.
	Virga Iesse florida,
	uirens et frondosa
	famulorum suscipe
	uota lacrimosa.

2	Tibi dictum credimus.
	Aue, uirgo pia.
	Nobis fer presidium,
	in presenti uia.
	Mater es et filia,
	fauente usia,
	rosa dicta, lillium
	uallium, MARIA.

3	Tu noua maris Stella,
	superni Verbi cella.
	Illius laus nouella,
	quem parturis puella.

4	Angelo credidisti,
	immensum concepisti,
	filium peperisti,
	hunc Deum protulisti.

	Oritur ortus rerum,
	fit antiquus dierum.
	Est enim lumen rerum,
	sanitas specierum.

6	Geris in sinu prolem
	que terre librat morem,

7	Fouens a quo foueris
	seruas a quo doceris.

8	Tu fontis fons uiuentis,
	oriens orientis.

9	Liber ille signatus
	uiro doctori datus.

10	[Tu] es terra celestis
	ferax uite non pestis.

11	Ex te ueritas orta
	per quam mors est absorta.

12	Ex te brotus egressus
	qui prelo crucis pressus.

13	Vino rigat arentes
	Sancti Spiritus mentes.

14	Que iam uirgo feta,
	donis Dei repleta,

15	Nostrum aue diceris;
	ut illud quod mereris

16	Solue tu quod debemus,
	auerte quod timemus,

17	Impetra quod optamus,
	perfice quod speramus.

18	Ut uitemus stigis penam,
	habeamus agni cenam
	in celesti patria.
	Sic cum Sanctis coronemur
	ut cum Christo gloriemur
	in perhenni gloria. Amen